「嘈咩啫？有名你叫人事部啊嘛，唔夠人梗係搵你地幫手啦！」呢句說話真係好討厭，次次唔夠人第一時間就奉旨要我地交人出嚟，大至出Show做MC做搞手，小至活動上做人型指示牌。

公司為咗想做好「與員工同樂」嘅形象，一早開咗一條大Team負責搞Event和Training，但係大家依然係好根深柢固覺得係人事部嘅職責嚟，唔肯接手就係卸膊囉！除咗每年例牌嘅Annual dinner，運動會，N樣比賽和工作坊呢啲擾民活動之外，近年仲加插咗一個由各部門輪流去度一啲表演環節同埋小遊戲嘅交流會，各個阿Head真係頭都大埋，難道公司嘅Branding就係要建立喺同事嘅Workload上面嗎？

「阿熊，嚟緊個ICAC講座你去Set up晒啲電腦佢啦！」Seafood阿頭行過黎輕輕拋低一句就想轉身走，「咦？應該係I.T.部門個邊嘅添叔跟進，啲搖控、咪高峰同埋電線都喺佢地度。 」阿頭可能無諗過我會駁嘴，突然心煩氣燥起上嚟，「我唔知啊，總之你安排好晒佢啦！我叫你做咁就係你做架啦！」聽完最後個句悔氣說話，我係立即著晒火，但要按捺住，「我聯絡番I.T.部門嗰邊無問題，不過以我嘅職級人地可能未必會聽，由你出面同番佢地講會比較好。 」阿頭聽唔入耳，已經極速遠遠逃離我嘅視線了。結果如我所料，添叔話好忙，直接打電話問阿頭係咪落柯打要佢地做，Seafood竟然話：「無，我叫阿熊做咋嘛。 」原本，呢個ICAC講座係I.T.部門嘅主管安排俾I.T.同事去聽，咁點解關我地人事部事呢？點解Seafood咁驚死有咩Request都照食可也呢？又點解一而再再而三要我做埋人地份Job duty呢？Seafood唔識推Job，開咗個頭就返唔到轉頭，雖然我已聲明今次義務幫手，下次「希望」Seafood第一時間彈返個Request俾人，因為事實已經證明咗由我去叫人做係嘥氣的，但我知，Seafood會繼續扮傻。

一日到黑不停MultI.T.ask自己嘅Core duty同埋Ad hoc野，係好易精神分裂。你上司只要求你做好Core duty，其他野純粹想出個人交吓數，認為你根本無需要咁落力去幫手。但上司嘅上司就要求你喺Ad hoc野表現要同時出色，至少喺活動中展示到人事部嘅馬仔幾咁踴躍幾咁開心「有幸」去參與，感染其他同事一齊咁投入，咁看在大老闆眼裡件事就好完美啦！

由於同事「表現」太好，高層當然希望呢類擾民活動愈嚟愈多，得閒咪黎講兩句開場白影番張大合照做宣傳，但背後用咗幾多同事加班嘅時間嚟湊合呢個Show唔會有人關心。各個部門又將責任推返喺人事部身上，而Seafood為咗面子就合埋眼推晒俾啲小薯仔。唉，我地都已經被利用到枯竭得一乾二淨，睇住身邊一個又一個咁走，小熊可能都要執定……被舖準備做通宵啦！

圖：Shutterstock

以上文章刊於《招職》。